Гродна

10 гадоў праўды

24 красавіка 1997 года убачыў сьвет першы нумар адноўленай “Газэты Слонімскай”. Газэта з такой жа назвай, толькі на польскай мове была заснаваная ў снежні 1938 года беларускім паэтам Сяргеем Новікам –Пяюном і ягонай жонкай Людмілай. Але неўзабаве выданне было зліквідавана польскімі ўладамі па палітычных матывах. Штосьці падобнае адбываецца ў Слоніме і праз 70 гадоў: толькі цяпер беларускія ўлады спрабуюць зліквідаваць апошнюю незалежную газэту на Гарадзеншчыне.
“Газэта Слонімская” выходзіць на 40 палосах накладам ад 7 да 8 тысяч асобнікаў раз на тыдзень і распаўсюджваецца ў Слонімскім, Дзятлаўскім, Зэльвенскім, Мастоўскім і Ваўкавыскім раёнах Гарадзеншчыны. Як і шматлікія незалежныя выданні, газэта не распаўсюджваецца праз “Белпошту” і “Белсаюздрук”. Але ў адрозненні ад іншых незалежных сродкаў масавай інфармацыі, рэдакцыя “Газэты Слонімскай” стварыла эфектыўную сістэму распаўсюду, што дае шанец існаваць у досьць складаных умовах беларускай сучаснасьці.
10-гадовы юбілей калектыў газэты адзначыць, але не сёння і вельмі сьціпла. Журналісты не будуюць вялікіх планаў на будучыню, а дзякуюць Богу за тое, што сёння газэта выходзіць, мае сваё кола чытачоў і нясе людзям слова праўды, негледзячы на ціск і перашкоды з боку ўлады.