Гродна

Радзільны дом без вады

Адсутнасьць вады медычны персанал радзільнага дома тлумачыць правядзеннем рамонтна – прафілактычных прац. Старое абсталяванне часта псуецца, таму  і узнікаюць пэўныя праблемы. У сувязі з адсутнасьцю гарачай і халоднай вады будучыя матулі  не могуць прыняць душ , а карыстацца прыбіральняй павінны у іншым корпусе. Тыя, каму ваду прыносяць родныя і блізкія, гігіенічныя працэдуры ажыццяўляюць у палатах, дзе знаходзіцца па 5-6 чалавек.

Акрамя праблемаў з вадой, у радзільным доме ажыццяўляецца рамонт . Трэск і грукат стаіць па ўсім корпусе, што перашкаджае жанчынам, якія знаходзяцца на захоўванні і тым, хто ўжо стаў маці адчуваць сябе у спакоі. Жанчыны скардзяцца лекарам на галаўныя болі у сувязі з павышаным шумам, але тыя толькі разводзяць рукамі і кажуць, што рамонт таксама неабходна рабіць.

Частка гарадзенскага радзільнага дома працяглы час знаходзіцца на капітальным рамонце, у сувязі з чым роды прымаюць у новым корпусе і ў гарадскім клінічным шпіталі, дзе тэрмінова адчынілі акушэрскае аддзяленне. Згодна з планам рамонтныя працы павінны былі даўно завяршыцца, але недахоп сродкаў перашкодзіў зрабіць гэта своечасова, таму  гарадзенскія жанчыны вымушаны нараджаць дзяцей у экстрэмальных умовах.