Гродна

Вецер дасьць энэргію

6 мэтраў у секунду дасягае сярэднегадавая сіла вятроў на адгор’ях Наваградскага ўзвышша каля вёскі Дуброва. Менавіта такую хуткасьць вылічылі навукоўцы Беларускай акадэміі навук у гэтай мясцовасьці, у сувязі з чым і было прынята рашэнне аб узвядзенні трох ветракоў для вытворчасьці электрычнай энэргіі. Танная энэргія будзе выпрацоўвацца ў аб’ёме 210 кілават на гадзіну, што павінна цалкам забяспечыць гаспадарку “Сьвіцязянка - 2003”. Рэшткі электрычнай энэргіі з задавальненнем купіць прадпрыемства “Гроднанэрга”.

У дадзены момант вядуцца працы па закладцы фундаманту і пад’яздных шляхоў да мачтаў. Прычым, будоўлю аплочвае сельскагаспадарчы кааператыў “Сьвіцязянка - 2003”, які і будзе ўладальнікам энэргетычнага абсталявання.

З трох ветракоў адзін айчыннай вытворчасьці, два астатнія  - з італьянскімі камплектуючымі.

 Першую устаноўку абсталююць у траўні, дзьве астатнія – летам бягучага года. Агульны кошт праекта складае 380 мільёнаў рублёў, але калі ветракі будуць спраўна працаваць, затраты акупяцца праз чатыры месяцы.