Гродна

"Халявы" не будзе

Перад святам 8 сакавіка супрацоўнікі гарадзенскіх праваахоўных органаў канфіскавалі касметыку “Арыфлэйм” , якая знаходзілася на офісе індывідуальнага прадпрымальніка Віктара Барысевіча. Свае дзеянні міліцыянты абгрунтавалі тым, што бізнэсовец парушыў правілы захоўвання спіртаўтрымліваючых вадкасьцей. Негледзячы на тое, што тавар быў аплочаны пакупнікамі, офіс апячаталі, а заказчыкам абвесьцілі, што згодна з беларускім заканадаўствам, касметыку прададуць праз гандлёвую сетку. У газеце “Вячэрні Гродна” нават з’явіўся артыкул аб тым, што хутка ў мясцовых крамах з’явіцца добраякасная шведская касметыка.

Больш за 200 чалавек, якія аплацілі кошт касметыкі праз аддзяленне “Беларусьбанка” звярнуліся з адмысловымі заявамі ў пракуратуру і паведамілі, што міліцыянты скралі іх уласныя рэчы. Кіраўніцтва кампаніі наняло адвакатаў і справа разглядалася ў судзе. У выніку суд вынес адпаведнае рашэнне, згодна з якім дзеянні міліцыянтаў не адпавядаюць беларускаму заканадаўству, а 380 пакункаў касметыкі вярнулі законным уладальнікам.

Аднак супрацоўнікі міліцыі не хочуць змірыцца з тым, што перавысілі свае паўнамоцтвы, у сувязі з чым дзейнасьць індывідуальнага прадпрымальніка узмоцнена правяраецца шматлікімі кантралюючымі органамі.